સેનાનો વધુ એક જવાન શહીદ, ત્રણ દિવસમાં ચાર શહીદ

જમ્મુ-કાશ્મીરના અનંતનાગમાં ચાલી રહેલા એન્કાઉન્ટર સ્થળ પરથી એક દુઃખદ સમાચાર આવી રહ્યા છે. મોડી રાત્રે ત્રણ દિવસથી ચાલી રહેલા આતંકવાદી અથડામણમાં વધુ એક જવાન શહીદ થયો હતો. આ સૈનિક ગુરુવારે ઘાયલ થયો હતો. આ સાથે જ આ ઓપરેશનમાં ચાર જવાન શહીદ થયા છે અને લગભગ પાંચ સેનાના જવાન ઘાયલ હોવાનું કહેવાય છે. આ એન્કાઉન્ટરમાં સ્થાનિક આતંકવાદી ઉઝૈર ખાન સહિત બે પાકિસ્તાની આતંકવાદીઓ સામેલ હોવાનું કહેવાય છે. ઉઝૈર ખાન અનંતનાગ નો છેલ્લો સક્રિય આતંકવાદી છે. આ વર્ષે ભારતીય સેનાએ સૌથી વધુ પાકિસ્તાની આતંકવાદીઓને ઠાર કર્યા છે.

નોંધનીય છે કે બુધવારે થયેલા આ એન્કાઉન્ટરમાં રાષ્ટ્રીય રાઈફલ્સ 19ના કમાન્ડિંગ ઓફિસર કર્નલ મનપ્રીત સિંહ, બટાલિયન કમાન્ડિંગ મેજર આશિષ ધોનક અને જમ્મુ-કાશ્મીર પોલીસના ડીએસપી હુમાયુ ભટ શહીદ થયા હતા. અનંતનાગ એન્કાઉન્ટરમાં શહીદ થયેલા મેજર અને કર્નલ ના મૃતદેહને આજે બપોરે તેમના વતન ગામ લઈ જવામાં આવશે, જ્યાં તેમના અંતિમ સંસ્કાર કરવામાં આવશે. શહીદ કર્નલ મનપ્રીત સિંહ પંજાબના મોહાલી જિલ્લામાં સ્થિત ભદૌરિયા ગામના રહેવાસી છે. મેજર આશિષ ધોનકનો પરિવાર પાણીપતના સેક્ટર 7માં રહે છે, તેમના પૈતૃક ગામ બિજોલ છે.

ભારતીય સેનાએ સમગ્ર વિસ્તારને ઘેરી લીધો છે. આતંકવાદીઓને ઠાર મારવા નું ઓપરેશન તેજ કરવામાં આવ્યું છે. ચાર કિલોમીટરના વિસ્તારને સંપૂર્ણપણે સીલ કરી દેવામાં આવ્યો છે. આ ઓપરેશનમાં 500થી વધુ સૈન્યના જવાનોને તૈનાત કરવામાં આવ્યા છે. અનંતનાગમાં ચાલી રહેલા એન્કાઉન્ટરમાં ત્રણ આતંકીઓની સંડોવણી હોવાની આશંકા છે. એક આતંકવાદી ઉઝૈર ખાન અહીંનો  સ્થાનિક આતંકવાદી છે જ્યારે બે આતંકવાદીઓ પાકિસ્તાની હોવાનું કહેવાય છે. ભારતીય સેના તરફથી મળેલી માહિતી મુજબ આતંકીઓ હાલમાં લગભગ 700 મીટરની ઊંચાઈ પર એક ટેકરી પર બેઠા છે. તેઓ અહીંથી ફાયરિંગ કરી રહ્યા છે.

લાઈક અને ફોલો કરો અમારું ફેસબુક પેજ FACEBOOK - PROUDTAPI

ફોલો કરો અમારું ઇન્સ્ટાગ્રામ INSTAGRAM - PROUDTAPI

સબસ્ક્રાઈબ કરો અમારી યૂ ટ્યૂબ ચેનલ YOUTUBE - PROUDTAPI

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  8000930590