ગુજરાત : કચ્છ વિસ્તારમાં ધોધમાર વરસાદ, માંડવીમાં 10 કલાકમાં 11 ઈંચ

કચ્છ જિલ્લામાં ગુરુવારે ધોધમાર વરસાદ પડ્યો હતો. કચ્છ જિલ્લાના માંડવી તાલુકામાં 10 કલાકમાં સૌથી વધુ 11 ઈંચથી વધુ વરસાદ નોંધાયો છે.

ગુજરાતમાં છેલ્લા ત્રણ દિવસની સરખામણીએ વરસાદનું જોર થોડું ઓછું થયું હોવા છતાં સૌરાષ્ટ્રના દેવભૂમિ દ્વારકા બાદ ગુરુવારે કચ્છ જિલ્લામાં વરસાદનું તાંડવ જોવા મળ્યું હતું. કચ્છ જિલ્લાના માંડવી તાલુકામાં 10 કલાકમાં સૌથી વધુ 11 ઈંચથી વધુ વરસાદ નોંધાયો છે. આ જ જિલ્લામાં મુન્દ્રામાં 7 ઈંચ અને અબડાસામાં 4 ઈંચથી વધુ વરસાદ નોંધાયો છે. બીજી તરફ દેવભૂમિ દ્વારકા જિલ્લાના દ્વારકા તાલુકામાં પાંચ ઈંચ વરસાદ નોંધાયો હતો.

સવારે 6 વાગ્યાથી સાંજના 8 વાગ્યા સુધી 216 તાલુકાઓમાં વરસાદ નોંધાયો હતો. આ સાથે રાજ્યમાં સવાર સુધીમાં 109 ટકાથી વધુ વરસાદ નોંધાયો છે. બીજી તરફ હવામાન વિભાગે સૌરાષ્ટ્ર વિસ્તારમાં બે દિવસ ભારે વરસાદની સંભાવના વ્યક્ત કરી છે.

ગુરુવારે કચ્છ જિલ્લાના અંજાર, ગાંધીધામ, લખપત, ભુજ, ભચાઉ અને નખત્રાણા તાલુકામાં એકથી બે ઈંચ વરસાદ નોંધાયો હતો. રાજકોટ જિલ્લાના લોધિકા, દેવભૂમિ દ્વારકા જિલ્લાના ખંભાળિયા, સુરેન્દ્રનગર જિલ્લાના ચુરા અને ચોટીલા, અમદાવાદ જિલ્લાના ધોલેરા અને જામનગર જિલ્લાના જોડિયા તાલુકામાં પણ આવો જ વરસાદ થયો છે.

103 ડેમ 100% ભરાયા, 125 હાઈ એલર્ટ પર
રાજ્યમાં ભારે વરસાદને કારણે ડેમોની જળ સપાટીમાં ઝડપથી વધારો થયો છે. હાલ 207 ડેમમાંથી 103 ડેમ 100 ટકા ભરાયા છે. જ્યારે 90 ટકાથી વધુ પાણીનો સંગ્રહ થતાં 125 ડેમને હાઈ એલર્ટ પર જાહેર કરવામાં આવ્યા છે. 18 ડેમ એલર્ટ પર છે અને પાંચ વોર્નિંગ પર છે. બીજી તરફ નર્મદા ડેમમાં પણ 85.59 ટકા પાણીનો સંગ્રહ થયો છે. હાલમાં 15 નદીઓ વહેતી છે.

આજે પણ કચ્છ-સૌરાષ્ટ્રમાં ભારે વરસાદની ચેતવણી
હવામાન વિભાગના જણાવ્યા અનુસાર, શુક્રવારે કચ્છ, રાજકોટ, જામનગર, પોરબંદર, જૂનાગઢ, મોરબી અને દેવભૂમિ દ્વારકા જિલ્લાના કેટલાક ભાગોમાં ભારેથી અતિ ભારે વરસાદ પડી શકે છે. આ જિલ્લાઓમાં રેડ એલર્ટ જારી કરવામાં આવ્યું છે. સૌરાષ્ટ્રના સુરેન્દ્રનગર, અમરેલી, ભાવનગર અને બોટાદમાં ભારે વરસાદની સંભાવના છે. જ્યારે અન્ય કેટલાક જિલ્લાઓમાં ભારે પવન સાથે હળવાથી મધ્યમ વરસાદની શક્યતા છે. ગુજરાતમાં આગામી સાત દિવસ ભારે વરસાદ પડી શકે છે.

દ્વારકા તાલુકામાં 355 ટકા વરસાદ
રાજ્યના 23 જિલ્લાઓમાં સરેરાશ વરસાદ સૌરાષ્ટ્રના દેવભૂમિ દ્વારકા જિલ્લામાં સૌથી વધુ 243 ટકા નોંધાયો છે. આ જ જિલ્લાના દ્વારકા તાલુકામાં 355 ટકા છે, જે 251 તાલુકાઓમાં સૌથી વધુ છે.

લાઈક અને ફોલો કરો અમારું ફેસબુક પેજ FACEBOOK - PROUDTAPI

ફોલો કરો અમારું ઇન્સ્ટાગ્રામ INSTAGRAM - PROUDTAPI

સબસ્ક્રાઈબ કરો અમારી યૂ ટ્યૂબ ચેનલ YOUTUBE - PROUDTAPI

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  8000930590