વ્યારા: તાંત્રિક વિધિના નામે ૫.૬૬ લાખની છેતરપિંડી, કપડવણનો ભગત બન્યો શિકાર

પ્રાઉડ તાપી - વ્યારા : તાપી જિલ્લાના વ્યારા તાલુકામાં તાંત્રિક વિધિથી પૈસા ડબલ કરી આપવાની લાલચ આપીને એક ભોળા ભગત  સાથે ૫.૬૬ લાખ રૂપિયાની છેતરપિંડી થયાનો સનસનાટીભર્યો કિસ્સો સામે આવ્યો છે. કપડવણ ગામના નરેશભાઈ દિનેશભાઈ ગામીત નામના ૪૩ વર્ષીય કડિયાકામ કરતા ભગતને  બે ઠગબાજો, પરબતભાઈ બરાઈ અને હર્ષદ બાપુ, ના હાથે પોતાની જીવનભરની મહામૂલી જમીન વેચેલી જમીનની  કમાણી ગુમાવી દીધી છે. આ બનાવ ગત સોમવારે, ૧૯ મે, ૨૦૨૫ ના રોજ રાત્રિના ૯:૦૦ થી ૧૦:૦૦ વાગ્યા દરમિયાન કપડવણ ગામમાં આવેલા નરેશભાઈના ખેતરે બન્યો હતો. 

ઘટનાક્રમ અને ઠગાઈની મોડસ ઓપરેન્ડી:

પોલીસ ફરિયાદ મુજબ, ફરિયાદી નરેશભાઈ દિનેશભાઈ ગામીત (ઉ.વ. ૪૩), જેઓ વ્યવસાયે કડિયાકામ કરે છે અને કપડવણ ગામ, નિશાળ ફળિયામાં તેમના પરિવાર સાથે રહે છે. નરેશભાઈ દેવમોગરા માતાજીના ભગત છે અને પૂજા-પાઠ કરીને લોકોના દુઃખ દૂર કરવાનું કામ કરે છે. તેમણે પોતાના ઘરે માતાજીની મૂર્તિ સ્થાપી મંદિર પણ બનાવેલું છે.

આશરે પંદરેક દિવસ પહેલા નરેશભાઈના મિત્રો શંકરભાઈ (રહે. કહેર ગામ) અને નરેશભાઈ (રહે. મઢી) એ તેમને જણાવ્યું હતું કે, તાડકુવા ગામે પરબતભાઈ બરાઈ નામનો એક વ્યક્તિ છે જે તાંત્રિક વિદ્યા જાણે છે અને પૈસા ડબલ કરે છે. આ માહિતી મળ્યા બાદ, થોડા દિવસો પછી નરેશભાઈ અને તેમના બંને મિત્રો વ્યારા-ખેરવાડા રોડ પરના પેટ્રોલ પંપ પાસે પરબતભાઈને મળ્યા હતા. પરબતભાઈએ તેમને વિશ્વાસ અપાવ્યો હતો કે તે તાંત્રિક વિધિથી પૈસા ડબલ કરી શકે છે.

નરેશભાઈ હાલ નવું મકાન બનાવવાની તૈયારીમાં હતા. તેમની માતાની ચોરવાડ ગામ ખાતે આવેલી જમીન વેચાણ થઈ હતી, જેના ૯,૯૦,૦૦૦ રૂપિયા તેમના સુરત ડિસ્ટ્રિક્ટ બેંકના ખાતામાં જમા હતા. નરેશભાઈએ આ તાંત્રિક પરબતભાઈને પોતાના પૈસા વિધિ કરીને ડબલ કરી આપવા વિનંતી કરી, જે માટે પરબતભાઈએ હા પાડી હતી.

ગત સોમવારે, ૧૯ મે, ૨૦૨૫ ના રોજ, નરેશભાઈએ તેમના બંને મિત્રો શંકરભાઈ અને નરેશભાઈને પોતાના ઘરે બોલાવ્યા હતા. રાત્રિના આઠ વાગ્યાના સુમારે, પરબતભાઈ બરાઈ એ નરેશભાઈને ફોન કરીને પાનવાડી ગામે મંદિર પાસે લેવા બોલાવ્યા. નરેશભાઈએ તેમના ઓળખીતા ધર્મેશભાઈ ગામીત (રહે. વાંદરદેવી) ને તેમની હ્યુન્ડાઈ એસેન્ટ ગાડી લઈને પરબતભાઈને લેવા મોકલ્યા.

રાત્રિના આશરે નવેક વાગ્યે પરબતભાઈ અને તેમની સાથે હર્ષદ બાપુ નામના અન્ય એક વ્યક્તિ નરેશભાઈના કપડવણ ગામમાં આવેલા ખેતરે આવ્યા. ખેતરમાં આ બંને ઠગબાજોએ વિધિ કરવા માટે બેઠક જમાવી. નરેશભાઈ અને તેમના મિત્રો શંકરભાઈ તથા નરેશભાઈ પણ ત્યાં હાજર હતા. વિધિ શરૂ કર્યા બાદ, આરોપીઓએ પૈસા લાવી વિધિમાં મૂકવાનું કહ્યું. નરેશભાઈ શંકરભાઈ સાથે પોતાના ઘરે જઈને ૫,૫૧,૦૦૦ રૂપિયા રોકડા લઈને વિધિ વાળી જગ્યાએ આવ્યા અને તે રકમ આરોપીઓને આપી, જે તેમણે વિધિ વાળી જગ્યાએ મૂકી.

ત્યારબાદ, આરોપીઓએ ત્રણેય મિત્રોને પોતાના મોબાઈલ ફોન બંધ કરીને વિધિમાં મૂકવા કહ્યું, જેનું પાલન તેમણે કર્યું. થોડીવાર પછી, પરબતભાઈએ ત્રણેયને હાથમાં ચોખા આપીને થોડે દૂર ફેંકી આવવા જણાવ્યું અને ફેંકવા જતી વખતે પાછું ફરીને ન જોવાની સૂચના આપી. નરેશભાઈ અને તેમના મિત્રો ચોખા ફેંકવા ગયા તે જ વખતે, પરબતભાઈ અને હર્ષદ બાપુ રોકડા ૫,૫૧,૦૦૦ રૂપિયા  તથા આશરે ૧૫,૦૦૦ રૂપિયાની કિંમતના ૩ મોબાઈલ ફોન  લઈને નાસી છૂટ્યા હતા. ત્રણેય મિત્રોએ તેમની શોધખોળ કરી, પરંતુ તેઓ મળી આવ્યા નહોતા.

આખરે, નરેશભાઈ દિનેશભાઈ ગામીતે , ૨૦ મે, ૨૦૨૫ ના રોજ સવારે ૬:૦૦ વાગ્યે વ્યારા પોલીસ સ્ટેશનમાં આરોપીઓ પરબતભાઈ બરાઈ (રહે. તાડકુવા, તા. વ્યારા) અને હર્ષદ બાપુ વિરુદ્ધ છેતરપિંડી અને મદદગારીનો ગુનો નોંધાવ્યો છે. પોલીસે ભારતીય નાગરિક સુરક્ષા સંહિતાની કલમ ૩૧૮(૪) અને ૫૪ હેઠળ ગુનો નોંધી, વધુ તપાસ પોલીસ સબ ઇન્સ્પેક્ટર જયભાઈ રમેશભાઈ સૂર્યવંશીને સોંપી છે. પોલીસે ગુનો નોંધી, આરોપીઓને ઝડપી પાડવા અને ગુમાવેલો મુદ્દામાલ પરત મેળવવા માટે ચક્રો ગતિમાન કર્યા છે. 

લાઈક અને ફોલો કરો અમારું ફેસબુક પેજ FACEBOOK - PROUDTAPI

ફોલો કરો અમારું ઇન્સ્ટાગ્રામ INSTAGRAM - PROUDTAPI

સબસ્ક્રાઈબ કરો અમારી યૂ ટ્યૂબ ચેનલ YOUTUBE - PROUDTAPI

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  8000930590